تذكرين لما حكيت لك قبل عن بدايتي في التوزيعات والحرف اليدوية؟ 🎁
اليوم ودي أشاركك غلطة سويتها بالبداية... مو عشان أحبطك 😅 بس عشان تتفادينها وتبدين بخطوات واثقة 👣
بصراحة؟ أول ما بدأت مشروعي كنت ماشية على البركة🎲
لا سويت ميزانية 💸، ولا حسبت التكاليف صح ، ولا سعرت منتجاتي بطريقة مناسبة 🔖
وقتها كانت هبّة المشاريع الحرفية وقلت: "يالله جربي، وش بتخسرين؟"
وفعلاً... استقبلت طلبات 🛍️ وجاني ربح، وانبسطت مرة 💃 💃
بس الحقيقة المرة بعدما استوعبت موضوع الميزانية و التسعير؟ الربح كان حلو مرة شكليًا 😅 بس لما أحسب الوقت اللي جلست فيه ساعات طويلة أشتغل، والمشاكل اللي تطلع لي فجأة بدون سبب والتعب اللي خلاني أنام وأنا منهدّة بدون عشى 🛌💤، والفلوس اللي طارت عالأجهزة والخامات 💸... أحسني طلعت بخس 😂 ومن هنا فهمت إن الشغف لحاله ما يكفي
لازم معاه تفكير ذكي + خطة مالية واضحة
وبالضبط هذا اللي بنتكلم عنه اليوم!
يلا خلينا نبدأ سوا بشي يفتح النفس ويعطيك دفعة حماس جديدة 💪
✨ كيف تبدين مشروعك الحرفي بميزانية ٥٠٠٠ ريال و أقل؟ لا تقولين ما أقدر!
كثير بنات عندهم شغف بالحرف والأشغال اليدوية، ويبدعون إذا مسكوا مقص أو خامة، بس لما يجي وقت الجد يقولون: "ما عندي ميزانية أبدأ فيها"، أو "أكيد أحتاج عشر آلاف عشان أبدأ"...
بس اسمحي لي أقولك: تقدرين تبدأين مشروعك الحرفي بـ ٥٠٠٠ ريال وأقل من كذا وبكفاءة بعد!
هنا بخليك تشوفين كيف:
💸 أولاً: احسبيها صح من البداية
لا تدخلين المشروع عشوائي. لازم تعرفين وش بتصرفين، وكم تبين تربحين، وهل بتكفين بالمبلغ اللي عندك.
سوي لك ورقة بسيطة أو استخدمي حاسبة العائد على الاستثمار (ROI) الي برفقها لك آخر المدونة، واللي فكرتها كذا:
- احسبي كل التكاليف: الخامات، الأدوات، التوصيل، حتى وقتك إذا تبين و المبلغ الهدف الي حابة توصلين له 🎯.
- احسبي كم راح تدخلين من بيع المنتج.
- واطلعي النسبة:
📌 العائد = (الربح ÷ التكاليف) × 100
إذا طلع معك رقم فوق ١٠٪، فأنتِ على الطريق الصح 👌
🧺 ثانيًا: جردي أغراضك!
قبل لا تفكرين تروحين محل خياطة أو تفتحين أمازون، افتحي دروجك!
عندك أكيد أشياء ناسية عنها:
– قماش باقي من مشروع قديم
– شرايط، لاصق حراري، مقصات، ألوان...
استغلي الموجود قبل ما تشترين، وخليه نقطة البداية.
🚨 نصيحة: خذي ساعة وسوي جرد، وسجلي وش ممكن يطلع لك من كل خامة.
✂️ ثالثًا: استثمري بذكاء – مو بكثرة
ما يحتاج تشترين كل الأدوات دفعة وحدة. أهم شي تبدين صح.
بس لو تبين ترفعين من جودة شغلك وتريحين نفسك:
جهاز القص (زي كريكت أو كاميو) يعتبر من أفضل الاستثمارات، لأنه:
- يوفر وقتك
- يضبط القص بدقة
- يخليك تسوين أشكال وطلبات ما تقدرين عليها يدوي
- ولو سعره عالي عليك؟ قسّطيه بـ "تابي" أو "تمارا" على أربع دفعات، كأنك تشترين شنطة ماركة بس بفائدة مستقبلية 😌
📱 رابعًا: خلي الانطلاقة بسيطة
لا تقولين "لازم أفتح متجر إلكتروني"، ابدئي من السهل:
- صوري شغلك بجوالك
- سوي حساب إنستقرام مرتب
- استقبلي الطلبات عالخاص أو بالواتساب
- ترى كثير متاجر مشهورة كانت تبدأ كذا، خطوة بخطوة و تذكري ﹝✿ قليلٌ دائِم ✿ خَيْرٌ مِنْ كَثِيرٍ مُنقَطِع ﹞
📣 خامسًا: التسويق أهم من المنتج أحيانًا!
قد يكون شغلك فخم، بس لو محد شافه؟ ما راح ينباع!
– شاركيه في قروبات الواتساب
– نزلي بوستات قبل وبعد
– سوي ستوري يومي عن خطوات شغلك وطلباتك
– وزعي عينات أو خصومات بسيطة للمقربين
ومع الوقت، تبدأ الناس تعرفك وتوصي عليك😍.
💎 سادساً: لا تقللين من نفسك
ابداعك ثروة 😍 ، ووقتك له قيمة ⏳، وموهبتك تستحق تنمو وتتحول لدخل💸 .
ابدئي بالموجود، احسبيها صح، وصدقيني ٥٠٠٠ ريال كافية جدًا كبداية.
لا تنتظرين "الوقت المثالي"... لأنه غالبًا، الوقت المثالي هو الآن!
الختام ✨
كونك حرفية مبدعة شيء رائع، لكن لما تصيرين مبدعة + ذكية مالياً، هنا يكبر مشروعك بثقة. لا تستهينين بأهمية الأرقام، هي اللي تفتح لك باب التوسع والنجاح بإذن الله 💪🏻
وأذكرك ان استخدام حاسبة الميزانية جداً سهل وننصحك بالاطلاع على هذا المقطع لمراجعة خطوات استخدامها.